Оқушылардың рухани білімдерін толықтыру мақсатында мектебіміздің ұстаздары Б.Ескендиров пен Д.Байдильдин 19 наурыз күні оқушыларды облыс орталығындағы мұражайларға саяхатқа апарды. Бұқар жырау атындағы әдебиет және өнер мұражайына барып, көптеген мәліметтер алды. Музей экспозициясы 7 (жеті) залда орналасқан: халық ауыз әдебиеті залы, көне түркі жазбалар ескерткіші залы, Бұқар жырау залы, ХХ ғасыр басындағы әдебиет, әдебиеттер достастығы залы, қазіргі заман әдебиеті залы, өнер залы. Қазіргі кезде музейде 49 мыңнан астам экспонат бар. Музей қорына көптеген бағалы жәдігерлер жинақталған. Облыстық ақын-жазушылардың, өнер майталмандарының жеке заттары, жәдігерлері мен қолжазбалары, өздері жасаған заттары музейдің баға жетпес құнды қазыналары болып табылады. Г.Н.Потанин атындағы Павлодар облыстық тарихи-өлкетану музейіне барып, археологиялық жәдігерлерді көріп, оқушыларымыз таңқалды. Музей жинақтарының негізін археологиялық, палеонтологиялық, этнографиялық, нумизматикалық, фотосуреттік, құжаттық, жаратылыстану-ғылыми, өндірістік, қару-жарақтар топтамалары құрайды. «Ertis» мультимедиалық музейіне де барды. Музей әлемнің ірі тарихи-жаратылыстану музейлерінің үлгісімен құрылған. Онда геология, физикалық география, ежелгі флора мен фаунасынан, Ертіс-Баян өңірінің палеозой заманынан бастап казіргі кезеңге дейінгі тарихын қамтиды. Бұқар жырау атындағы әдебиет және өнер мұражайының директоры Ербол Қайыров мырзаға, Г.Н.Потанин атындағы Павлодар облыстық тарихи-өлкетану музейінің директоры Г. Алиева ханымға, «Ertis» мультимедиалық музейінің басшысы А.Алиакпаров мырзаға алғысымызды білдіреміз.
